नेपालले यूएईसँग बदला लिदैं अर्को वर्ष वेस्ट इन्डिज र अमेरिकामा हुने ट्वान्टी २० विश्वकपमा छनोट हुने अवसर पाएको छ । ओमानसँग ट्वान्टी २० विश्वकप छनोट एसिया क्षेत्रको बिहीबार समूहचरणको अन्तिम खेलमा रोमाञ्चक ५ रनको हारपछि नेपालले समूहको उपविजेता भएर यूएईसँग खेल्नु परेको हो ।
नेपाललाई यूएईसँग बदला लिँदै विश्वकपमा पुग्ने अवसर अन्तिम ओभरको पहिलो ३ बलमा विवेक यादवले लगातार छक्का प्रहार गरे पनि नेपालले विजय हात पार्न सकेन् । १ सय ४६ रनको विजय लक्ष्य लिएर आएको नेपाल त्रिवि क्रिकेट मैदान कीर्तिपुरमा निर्धारित २० ओभर खेली १ सय ४० रनमा अलआउट भएको थियो ।
दीपेन्द्रसिंह ऐरी घाइते भएपछि प्रतियोगितामा खेल्ने मौका पाइरहेका विवेकले अन्तिम ओभरलाई सनसनी बनाएका थिए । सुरुआतमा रक्षात्मक भएर खेलेका विवेक अन्तिम ओभरमा आक्रामक बनेका थिए । आजको खेलबाट नेपाल क्रिकेटले अर्को एक खेलाडी पाएको भन्दै नेपालका प्रशिक्षक मोन्टी देसाईले विवेकको प्रशंसा गरे ।
नेपाल विश्वकपमा पुग्नेमा उनी विश्वस्त छन् । ‘आज हामीले लाइन क्रस गर्न सकेनौं । छनोट अझै सकिएको छैन, एउटा खेल अझै बाँकी छ । हामी विश्वकपमा छनोट हुन सक्छौं । त्यसका लागि खेलाडीले जिम्मेवारी भएर खेल्नु पर्छ,’ देसाईले भने, ‘आजको खेलबारेमा भन्नु पर्दा हामीले खेल र प्रतिद्वन्द्वीको पनि सम्मान गर्नुपर्छ । ओमानले लामो समयदेखि एकरुपको प्रदर्शन गर्दै आएको छ र २ पटक ट्वान्टी २० विश्वकप पनि खेलिसकेको छ ।’
सोमपाल कामी र सन्दीप लामिछानेलाई ब्याटिङमा माथि पठाउने निर्णयमा माथ खाएको थियो । आसिफ शेख तेस्रो ओभरमै आउट भएपछि तेस्रो नम्बरमा ब्याटिङमा आएका सोमपालले ९ बलमा १२ रनमात्र बनाउन सकेको थिए ।
सन्दीप जोरा १२ रन बनाई सातौं खेलाडीको रुपमा आउट भएपछि नेपाललाई ३१ बलमा ६१ रन बनाउनु पर्ने अवस्था थियो, यस्तो अवस्थामा करणभन्दा अगाडि सन्दीपलाई ब्याटिङका लागि पठाइएको थियो । तर सोमपाल र सन्दीपलाई ब्याटिङका लागि माथि पठाउने निर्णयको देसाईले रक्षा गरे ।
‘नेपाली टोलीका ११ जनै ब्याटिङ गर्न सक्छन् । एउटा योजनामा हिँडिरहेकाले सोमपाललाई माथि पठाउने निर्णय एउटा प्रयोगमात्र थिएन,’ देसाईले भने, ‘सोमपाल माथिल्लोक्रममा धेरै पटक खेलेका छन् । एसिया कपमा माथि ब्याटिङका लागि पठाउँदा उनले राम्रो गरेका थिए ।’
पहिलो दुई खेलमा सिंगापुर र मलेसियालाई पराजित गरी ओमानसँगको खेल अगाडि नै नेपाल सेमिफाइनल पुगिसकेको थियो । तर ओमानसँगको हारले नेपाल समूहको उपविजेतामै खुम्चियो ।
यूएईले मूलपानीमा भएको समूह ‘बी’ को अन्तिम खेलमा हङकङलाई २२ रनले पराजित गर्यो । मूलपानीमा भएको सबै ३ खेल जितेर यूएई समूह ‘बी’ को विजेता बन्यो । गत वर्ष ओमानमा सेमिफाइनलमा यूएईसँगै पराजित हुँदा नेपाल ट्वान्टी २० विश्वकपमा छनोट हुन असफल भएको थियो । यूएईले नेपाललाई ६८ रनले पराजित गरेको थियो ।
मोहम्मद वासिमले ४८ बलमा ७० र वृत्या आनन्दले २३ बलमा ५ चौका र ३ छक्का प्रहार गर्दै ४६ रन बनाएपछि यूएईले १७५/७ को स्कोर बनाएको थियो । जवाफमा नेपाल १८.४ ओभरमा १ सय ७ रन बनाई अलआउट भएको थियो । वासिम अहिले यूएईको कप्तान बनिसकेका छन् भने बिहीबार हङकङसँगको खेलमा नाडीमा चोट लागेका कारण वृत्याले नेपालविरुद्धको सेमिफाइनल खेल गुमाउन पनि सक्ने छन् ।
ट्वान्टी २० विश्वकप छनोट एसिया क्षेत्रको छनोट अघिको नेपाल ट्वान्टी २० आई त्रिकोणात्मक शृंखलामा डबल राउन्ड रोबिन लिगको दुवै खेलमा नेपालले यूएईलाई मूलपानीमा पराजित गरेको थियो । तर फाइनलमा यूएईले नेपाललाई ४ विकेटले पराजित गरेको थियो ।
शुक्रबार मूलपानीमा यूएईसँग सेमिफाइनल खेल्दा यी दुवै खेल पक्कै पनि नेपालको मस्तिकमा हुनेछ । तर नेपालको लक्ष्य अर्को वर्ष हुने ट्वान्टी २० विश्वकपमा हुनेछ । यूएईलाई पराजित गरी दशकपछि नेपाल पुनः ट्वान्टी २० विश्वकप खेल्न आत्तुर छ ।
