कपिलवस्तु । गणतन्त्र दिवसको पावन अवसरमा कपिलवस्तु नगरपालिका वडा नं १ को बजार क्षेत्रमा चिया पसल तथा पान पसलहरूलाई डस्टविन वितरण कार्यक्रम सफलतापूर्वक सम्पन्न भएको छ। यस कार्यक्रमको मुख्य उद्देश्य सो क्षेत्रमा स्वस्थ्य, स्वच्छ र हराभरा वातावरण निर्माण गर्नु रहेको छ।
कार्यक्रममा नगर प्रमुख सुदिप पौडेल, प्रमुख जिल्ला अधिकारी दिल कुमार तामाङ, सुरक्षा निकायका प्रमुख, वडा नं १ का वडाध्यक्ष मोहम्मद जाहिद खान, वडा सचिव सुभाष गौतम, वडा सदस्य तथा कर्मचारीहरू साथै विभिन्न सरकारी तथा गैरसरकारी निकायका प्रतिनिधिहरूले सक्रिय सहभागिता जनाएका थिए।
कार्यक्रमका दौरान नगर प्रमुख पौडेलले बजार क्षेत्र सफा राख्न र फोहोर व्यवस्थापनमा सुधार ल्याउन सबै व्यवसायी र स्थानीयवासीलाई आफ्नो भूमिकामा सचेत हुन आग्रह गरे। वडाध्यक्ष मोहम्मद जाहिद खान पनि स्थानीय संग सहकार्य गर्दै सफा र स्वस्थ्य वातावरण निर्माणमा सबैको योगदान आवश्यक रहेको बताएका थिए।
वडा कार्यालयका प्रतिनिधिहरूले डस्टविन वितरण कार्यक्रमलाई निरन्तरता दिँदै नियमित सफाइ तथा फोहोर व्यवस्थापनमा प्रभावकारी कदम चाल्ने योजना रहेको जानकारी दिए।
कार्यक्रमले सबै क्षेत्रमा दिगो विकास र स्वास्थ्यकर जीवनयापनका लागि वडा वासीको सक्रिय भागीदारी अपरिहार्य रहेको कुरामा जोड दिएको छ। कपिलवस्तु नगरपालिका वडा नं १ कार्यालयले यस प्रकारका पहलहरूलाई निरन्तरता दिँदै वडालाई अझै सफा, हराभरा र आकर्षक बनाउन प्रतिबद्धता व्यक्त गरेको छ।
