कपिलवस्तु, असार १ – मातृ तथा शिशु स्वास्थ्य सुरक्षाका लागि कपिलवस्तु नगरपालिका वडा नं. १ ले विशेष पहल स्वरूप सुत्केरी महिलालाई सुपानेट झुल वितरण गरेको छ। वडा अन्तर्गत रहेका ४० बढी महिलालाई निःशुल्क रुपमा सुपानेट झुल प्रदान गरिएको हो।
गौढीस्थित आधारभूत स्वास्थ्य सेवा केन्द्रमा आयोजित कार्यक्रममा वडा अध्यक्ष जाहिद खाँले झुल वितरण गरेका थिए। अध्यक्ष खाँले महिलाको स्वास्थ्य सुरक्षामा वडा कार्यालय प्रतिवद्ध रहेको जनाउँदै भविष्यमा पनि यस्ता कार्यक्रमलाई निरन्तरता दिइने प्रतिबद्धता व्यक्त गरे।
स्वास्थ्य केन्द्रकी अहेब सृजना भट्टराईले बताइन कि प्रोटोकल अनुसार चार पटकसम्म स्वास्थ्य संस्थामा नियमित जाँच गराउने र अस्पतालमै सुरक्षित रूपमा शिशु जन्माउने महिलालाई मात्र झुल प्रदान गरिएको हो। “घरमै बच्चा जन्माउने चलनलाई हटाउँदै सुरक्षित प्रसूति सेवा प्रोत्साहित गर्न यो कार्यक्रम ल्याइएको हो,” भट्टराईले भनिन्।
उनका अनुसार झुल वितरण कार्यक्रम मातृ तथा शिशु मृत्यु दर घटाउने अभियानकै हिस्सा हो। उक्त कार्यक्रम अन्तर्गत हालसम्म ४० बढी महिलालाई सुपानेट झुल वितरण भइसकेको छ भने बाँकी रहेका करिब २ सय सुत्केरी महिलालाई समेत वितरण गर्ने तयारी वडा कार्यालयले गरेको छ।
स्थानीय महिलाहरूले वडा कार्यालयको यो पहललाई सराहना गरेका छन्। उनीहरूका अनुसार यस्ता कार्यक्रमले महिलामा स्वास्थ्य सचेतना बढाउने तथा सुरक्षित मातृत्वतर्फ प्रोत्साहन गर्ने काम गरेको छ।
